O conselleiro de Economía, Emprego e Industria, Francisco Conde, reunirase cos representantes dos traballadores de Alcoa nas plantas da Coruña e San Cibrao. Na sala de xuntas da Consellería.
foto xoán crespo
31/05/16O conselleiro de Economía, Emprego e Industria, Francisco Conde, trasladoulles hoxe aos representantes dos comités de Alcoa que a Xunta apoiará “calquera decisión que pase pola continuidade das plantas” da Coruña e San Cibrao.
No encontro, celebrado en San Caetano, Conde incidiu en que para iso é necesario un proxecto industrial con garantías de continuidade, que deberá levar consigo os investimentos necesarios para dar unha maior competitividade a ambas plantas, e por suposto o mantemento dos postos de traballo tanto na Coruña como en San Cibrao.
O conselleiro reiterou que a Xunta mantén un contacto continuo coa empresa, e seguirá a facer un seguemento polo miúdo do proceso. Conde apuntou así mesmo que o Goberno galego espera que a compañía garanta un futuro para as plantas de Alcoa en Galicia, unha industria estratéxica para a comunidade e un motor económico para o norte da provincia de Lugo.
Na reunión tamén se incidiu na orde de interrumpibilidade, e en cales son os requirimentos e de cara ao futuro que precisa Alcoa e o conxunto de empresas electrointensivas que están a desenvolver a súa actividade en Galicia. Neste eido, Conde, que salientou que manterá o diálogo continuo cos traballadores, incidiu na necesidade dun contexto de maior certidume no ámbito da poxa eléctrica.
