O portal de transparencia do Concello de Lugo, recibiu máis de 2.500 visitas dende a súa posta en funcionamento, o pasado mes de maio. Nos tres meses que leva activo este portal houbo 975 visitantes distintos, que visitaron o portal cunha duración media da sesión de 1 minuto e 25 segundos, vendo unha media de 2,23 páxinas. O 43% dos elementos máis vistos refírense á composición, forma de designación e convocatorias das Mesas de Contratación así como ás direccións electrónicas tanto da alcaldesa e dos concelleiros do Goberno Municipal. Ademais, destacan pola visitas os datos biográficos da rexedora e dos concelleiros, a oferta pública de emprego e as ordes do día dos Plenos.
Neste novo portal, ao que se accede tamén dende a web lugo.gal e que cumpre cos índices de transparencia establecidos pola organización Transparencia Internacional, a cidadanía pode atopar 78 entradas con información, estruturada en 6 grandes apartados sobre a Corporación, servizos, economía, contratación, urbanismo e obras, e medio ambiente.
Facilitar o acceso á cidadanía á información pública é un dos obxectivos da posta en marcha deste novo portal, un dos compromisos fundamentais que adquiriu o Goberno ao inicio do mandato co fin de mellorar a calidade democrática e a transparencia. Nesta liña, O Goberno Local seguirá traballando para que este portal sexa vivo e dinámico, como a vida do propio Concello, actualizándose constantemente os datos e a documentación que se vaia xerando día a día.
