O BNG presentará unha proposta ao goberno municipal para que se proceda a mellorar o pavimento e a limpeza do calexón da rúa Milagrosa. O voceiro da formación, Rubén Arroxo, visitou este calexón con veciños da zona para coñecer as súas demandas. “Trátase unha vía pública que se atopa nunha situación de abandono e que precisa de pequenos amaños que, con moi pouco investimento, mellorarán considerablemente a calidade de vida das veciñas e veciños da zona”, salientou Rubén Arroxo.
Arroxo explicou que “habería que executar unha pequena intervención sobre o pavimento para evitar a acumulación de augas pluviais”. Ademais é preciso facer unha limpeza de todo o musgo que medra no calexón e dar unha solución á prancha metálica que atranca a saída do calexón. Arroxo explicou que o predio contiguo ao calexón é unha fonte de roedores, suciedade e maleza que debería estar totalmente illada do propio calexón.
Arroxo lembrou que “é unha pequena obra que melloraría a vida das persoas que viven nesta barrio histórico da cidade” e engadiu que “o goberno municipal debería utilizar a brigada de obras municipal para acometer estes pequenos arranxos”.
