Os edís de Lugonovo trasladaron ao Concello o malestar dos veciños da rúa Ramos Misioné que lamentan que “o Concello deixara a remodelación a medias. Uns traballos adxudicados por 29.330’40 euros e dentro dos que se reservaban, inicialmente, 4.859’78€ para o capítulo da sinalización”.
Segundo explica o voceiro de Lugonovo, Santiago Fernández Rocha, a rúa “é unha estrada que funciona como apoio, dentro da Acea de Olga, para distribuír aos vehículos que se dirixen, ben cara a zona universitaria ou á residencial. Precisamente foi a cantidade de circulación que soporta o que deteriorou o pavimento e xustificou a súa renovación. Trátase dunha vía cunha situación estratéxica, que ofrece un gran servizo a pesares de ser bastante estreita porque admite as dúas direccións ademais do estacionamento. Sen embargo, durante todo o seu percorrido non hai unha mísera liña de pintura que delimite algún destes espazos o que a convirte nun auténtico caos para a condución”
Rocha, critica que “o proxecto contemplaba a reposición das marcas viais existentes, a pintura das liñas brancas delimitadoras da calzada en todo o ámbito de actuación así como os pasos de peóns e o stop. Non sabemos o que puido pasar exactamente para que non se executara esta parte dos traballos pero, dende logo, o que reflexa é unha despreocupación absoluta por parte do equipo de goberno”.
Asemade, Fernández Rocha sinala que o Grupo Municipal ven de presentar varias preguntas sobre a labor de supervisión do cumprimento do contrato, outorgado en setembro de 2015. “Tamén queremos saber a que partidas corresponden os 21.974’17 euros que se lle entregaron á empresa en xaneiro de 2016, por que segue sen pagar o resto do presuposto, que unidades de obra non se acometeron e, o que nos parece máis importante, se continua ou non en vigor o período de garantía da reforma. Queremos coñecer e aclarar se o executivo aínda está en tempo de esixirlle a Asogal que realice canto antes o repintado de Ramos Misioné ou, se pola contra, o prazo de reclamación xa finalizou e será a administración quen teña que asumir agora un custo engadido para desenvolver estas tarefas. Cómpre ter en conta que, dos 240 metros previstos a sinalizar, só se certificaron 36 por valor de 705’18€”.
