O Voceiro municipal, Miguel Fernández, informou este venres das actuacións levadas a cabo polo servizo municipal dos bombeiros de Lugo no 2016. Durante ese ano atenderon unha media de 38 intervencións ao mes, a maioría por asistencias técnicas, que son aquelas que non responden a situacións de emerxencia.
Deste xeito, os bombeiros de Lugo deron resposta a un total de 458 incidencias, das cales 313 foron asistencias técnicas; 125, máis do 40% do total, foron incendios, concretamente 20 en edificios con vivendas, 9 en edificios sen vivenda e 96 responderon a outro tipo de incendios. Ademais, os bombeiros tiveron que intervir en 24 salvamentos ou rescates; sendo 81 as falsas alarmas ou saídas sen intervención, o que representa un 18% do total. O mes de maior actividade foi outubro con 60 saídas, sendo xuño cando máis falsas alarmas se produciron, cun total de 15.
Miguel Fernández explicou que “nunha década, dende o 2006, experimentouse unha baixada de 152 intervencións, posto que nese ano producíronse 610 actuacións dos bombeiros, o que se debe en gran medida á mellora do estado de conservación e construción dos edificios da nosa cidade”.
