Un home de 39 anos faleceu esta tarde nun accidente laboral. A vítima atopábase traballando nunha zona de monte de Lousada de Arriba, en Xermade, cando unha das árbores que estaba a cortar lle caeu enriba.
Segundo indicou un compañeiro da vítima ao 112, o seu obxectivo era trasladalo na súa furgoneta ao Complexo Hospitalario Universitario da Coruña, aínda que o varón acabou falecendo no camiño. Segundo engadiu, foi á altura de Bergondo cando se decatou de que o home falecera, momento no que decidiu poñerse en contacto co Centro de Atención ás Emerxencias do 112, dende o quilómetro 577 da N-VI.
O persoal da central de emerxencias do 112 alertou da situación a Urxencias Médicas, a Protección Civil e á Garda Civil. Os efectivos mobilizados só puideron confirmar a morte do home.
