Identificado o corpo que apareceu esta mañá na praia de Portelo, en Burela. Trátase dun veciño da localidade que saíra a pescar esta madrugada e todo apunta a que puido esbarar e caer ao mar. O GES de Cervo indicábao ao 112 Galicia ás 10:10 horas.
Tras recibir a alerta da aparición dun cadáver sobre as 08:30 desta mañá por parte dun particular o 112 Galicia puxo os feitos en coñecemento da Garda Civil, Policía Local e Protección Civil. Tamén se informou a Salvamento Marítimo e ao Servizo de Gardacostas de Galicia. Urxencias Médicas tamén se desprazou ata o lugar e confirmou que a persoa estaba falecida.
