A Deputación anunciou que o novo Secretario do ente provincial , Cristóbal Víctor Fraga Bermejo, tomou posesión esta mañá da súa praza, nun acto celebrado en San Marcos no que prestou xuramento ante a Constitución. Fraga Bermejo estivo acompañado polo Presidente da Deputación, Darío Campos Conde, quen lle deu a benvida á institución provincial e lle presentou aos voceiros da oposición, Elena Candia López, do PP, e Xosé Ferreiro Fernández, do BNG, así como a outros técnicos da Deputación.
O novo Secretario sustitúe no posto a Manuel Castiñeira, quen exerceu de forma provisional as funcións da Secretaría Xeral nos últimos 14 meses. Castiñeira reincorporarase á súa praza de Secretario no Servizo de Asistencia e Asesoramento aos Concellos da Deputación. As funcións básicas do Secretario son o asesoramento legal sobre procedementos administrativos e o exercicio da fé pública na institución provincial. O posto só pode ser ocupado por funcionarios de carreira con habilitación estatal.
