O deputado de En Marea por Lugo, Miguel Anxo Fernán, vén de presentar unha serie de preguntas dirixidas ao Ministerio de Interior para pedirlle explicacións pola morte dunha persoa presa “por sobredose de drogas” na madrugada do pasado sábado 24 de xuño.
“Como é posíbel que cheguen estupefacientes a mans dos internos con tanta facilidade? Non hai control? Como se explica que desde o ano 2006 prácticamente morra unha persoa presa por ano por estas circunstancias? Vai o Ministerio a abrir unha investigación ao respeito? Están claras as causas da morte deste interno? Non cre que se trata de feitos graves que denotan as deficiencias deste centro?”, son algunhas das preguntas que formula ao Goberno.
Fernán Vello afirma que “chama poderosamente a atención que un interno poida morrer a consecuencia dunha sobredose nun centro penitenciario. É doado deducir que os mecanismos de seguridade son verdadeiramente deficientes. E en segundo lugar, cabe deducir que a atención socio-sanitaria falla estrepitosamente no caso de persoas toxicómanas”.
