O Concelleiro de Deportes e Medio Rural, Miguel Fernández, o presidente do colectivo Somos Unidos Contra o Cancro de Lugo, José Manuel Vázquez, o presidente do Cafés Candelas Breogán, Jesús Lázare, e a Secretaria da Asociación de Autónomas de Lugo, Teresa Fernández, presentaron esta mañá unha actividade lúdico-deportiva para concienciar á sociedade luguesa sobre o cancro infantil. Trátase dunha gymkana grupal, polo centro da cidade, na que participarán os xogadores do Breogán.
No acto de presentación, Miguel Fernández felicitou á Asociación Somos Unidos contra o Cancro por conseguir, con esta xornada, unir deporte e solidariedade, amosando a disposición do Concello de colaborar con este tipo de iniciativas. Así mesmo, o edil convidou a toda a cidadanía a participar neste actividade cun fin tan loable, contando co añadido da participación dos xogadores da liga LEB Ouro nesta xornada.
Pola súa banda, Vázquez agradeceu a colaboración, tanto de Concello, coma do Breogán e a Asociación de Autónomas de Lugo para poder levar a cabo esta xornada. Lembrou que esta é a Semana Internacional do Cancro Infantil, semana chea de actividades, que terá o seu colofón nesta Gymkana Grupal. Jesús Lázare falou da disposición do Breogán de cara a este tipo de actividades de carácter social, sentindo un grande orgullo ao poder colaborar con asociacións coma Somos Unidos contra o Cancro.
Para rematar, Teresa Fernández, lembrou que o seu colectivo é unha asociación moi participativa, e máis cando se trata de causas solidarias, ao tempo que se amosou moi contenta de dar visibilidade a este evento a través das súas asociadas. A Gymkana Grupal, dirixida a nenos e nenas de 7 a 14 anos, arrincará ás 16:30 horas. As persoas participantes, divididas en grupos e guiados por un monitor, partirán da Praza Maior. Unha vez conseguidos os pases á seguinte proba, realizarán lanzamentos á canastra. Para finalizar, os dous equipos que superen antes as probas disputarán un xogo final, onde o equipo gañador recibirá unha serie de premios.
Para partcipar nesta gymkana é precisa a inscrición, que debe facerse no teléfono 699.92.52.96.
