A 19ª edición do mercado Volta ao Medievo, un evento promovido por antigos alumnos e alumnas da Escola de Artes Aplicadas Ramón Falcón, xunto ao concerto de Pussy Riot e Marky Ramone que terá lugar esta tarde, a partir das 20:30h, na praza Horta do Seminario, marcan a xornada de fin de festa do San Froilán. Xunto a estes actos, o programa organizado para as patronais, inclúe hoxe as actuacións dos grupos Devandoira, Parentes, Xílgaros de Lugo, Meigas e Trasgos, Habelas Hainas e a orquestra Pontevedra, ademais do concerto de Myles Sanko, ás 23:00 horas, en Santa María.
A programación de actividades das festas remata hoxe, pero seguirá aberto durante toda a fin de semana o feiral, con descontos nas barracas para os máis pequenos, así como ArteSanfroilán.
