O vicepresidente da Deputación, Argelio Fernández Queipo, deu conta esta mañá dos asuntos acordados na Xunta de Goberno de hoxe. Fernández Queipo destacou a aprobación de novos pregos para a contratación da conservación da rede viaria provincial, que favorecen o emprego fixo e feminino na obra pública, entre outros aspectos sociais.
“Establecemos pioneiras cláusulas en defensa da igualdade e dos dereitos dos traballadores da obra pública, que é o sector e o convenio laboral no que enmarcan estes traballos”, apuntou o vicepresidente.
Ademáis de ter en conta o número de mulleres que haxa no cadro da empresa que faga a oferta, o executivo tamén primará a aqueles ofertantes que conten cun maior número de contratos fixos e estables e con melloras nas condicións dos traballadores con respecto ao esixido por convenio ou o uso de vehículos eléctricos. Asemade, a Deputación garantirá a obtención do contrato por pequenas empresas desglosando en lotes os traballos a realizar para poder dividilos entre 8 adxudicatarios que darán traballo a un total de 48 empregados.
Ademais de aprobar hoxe o novo prego, o Goberno da Deputación acordou iniciar o proceso de contratación destes traballos aos que achega un total de 6,4 millóns para a conservación das 8 zonas nas que está dividida a rede viaria provincial.
