Na cidade de Lugo hai censados case 14.000 cans, por esta razón, Lugo Monumental quere facilitar a convivencia con mascotas nos locais comerciais do centro histórico e para iso comeza unha sinxela campaña que pretende axudar tanto a comerciantes como a propietarios de mascotas para establecer con claridade certos límites e aprender a lidar con diferentes situacións.
A campaña, presentada esta mesma mañá, céntrase en tres piares fundamentais, que comezan por asignar un distintivo para os locais que permitan acceder con animais de compañía, unha das situacións que tende a crear máis confusión entre os propietarios de mascotas.
A actual lexislación, e en concreto a Lei 4/2017 do 3 de outubro, de protección e benestar dos animais de compañía en Galicia, establece unha serie de limitacións para o acceso de animais a establecementos segundo a súa actividade. Por exemplo, teñen prohibida a entrada naqueles en que se elaboren e vendan produtos alimenticios, salvo os locais de hostalería en que é o propietario o que decide, do mesmo xeito que nos demais establecementos comerciais.
Unha pegada de can en vermello ou en verde, segundo estea vedado ou permitido o acceso, é unha mensaxe moi visual, e permite que a decisión estea clara desde o primeiro momento evitando situacións incómodas. Por suposto os cans guía están excluídos de toda prohibición, xa que poden acceder a calquera local sen ningún tipo de limitación.
Outro dos puntos presentados pola asociación é a elaboración dunha guía de locais pet friendly. Unha vez distribuíronse os distintivos, elaborarase unha guía dos locais pet friendly do centro histórico pertencentes a Lugo Monumental, e enviarase ás cada vez máis abundantes páxinas web que dan dita información aos propietarios de mascotas.
Por último, a asociación elaborará e difundirá un decálogo, dirixido tanto aos asociados de Lugo Monumental como aos propietarios de cans, que pretende facer fincapé nos diferentes comportamentos que son desexables por ambas as partes. Inciden na importancia de permitir a entrada de cans nos establecementos, o agradecemento que adoitan mostrar os seus propietarios e detalles de amabilidade como ter dispoñible un recipiente con auga ou premios apropiados, aínda que sempre consultando ao cliente.
Pola súa banda lémbrase aos donos dos cans a súa responsabilidade sobre os actos destes, a súa obrigación de mantelos sempre baixo control e certas normas de cortesía como ter presente que hai persoas con medo aos cans, alerxias ou aos que simplemente non lles gustan e non teñen por que sufrir unha situación que lles resulte desagradable. A mensaxe máis importante que pretende transmitir o decálogo é que aínda que se autorice a entrada de mascotas a un local hai elementais obrigacións que hai que cumprir por ambas as partes para lograr evitar situacións conflitivas.
