O concerto de Pablo López pechará mañá no Pazo de Feiras e Congresos de Lugo a programación de O Son do Camiño 2018, o festival co que Galicia promove a celebración do Xacobeo 2021.
A delegación territorial da Xunta en Lugo acolleu hoxe a presentación desta cita, prevista para as 21.00 horas. O recinto ten aforo para 2.500 persoas e foron vendidas ata o de agora máis do 90% das entradas.
O delegado territorial, José Manuel Balseiro, destacou que “a actuación do intérprete e compositor na nosa cidade convértese nun evento cultural de primeiro nivel, como tamén o é este artista”. A de mañá é a última das seis citas musicais que completaron este outono a programación de O Son do Camiño, nas que a Administración autonómica participa como patrocinador principal.
Na presentación participaron o xefe territorial en Lugo da Consellería de Presidencia, Ramón Carballo; a responsable de Cultura, María José Gómez, e Iria Quelle, integrante do equipo promotor do festival O Son do Camiño. Quelle destacou que o concerto terá lugar nun formato a modo de teatro, “no que os asistentes poderán gozar da paixón e sensibilidade” do intérprete, apuntou.
Despois de que o festival O Son do Camiño tivera lugar en Santiago de Compostela, a programación ampliouse cun cartel protagonizado por recoñecidos artistas nacionais e internacionais que actuaron noutras seis cidades galegas, situadas en diversos itinerarios xacobeos.
