O Centro de Innovación Social InLugo que xestiona a Fundación TIC a través dunha encomenda da Deputación, comezou este mércores en 6 parroquias do Concello de Lugo, unha nova tempada de actividades. A principal novidade desta etapa é a realización de cursos e obradoiros en toda a provincia, para achegar as novas tecnoloxías a todos os maiores de 55 anos independentemente do seu lugar de residencia.
En concreto, neste 2º trimestre haberá actividades en 11 concellos e 10 parroquias do municipio de Lugo, ademais das habituais na sede do centro. En total, 53 cursos obradoiros e preto de 600 prazas gratuítas.
Os primeiros cursos desenvolveranse o 8 e 9 de abril nas parroquias de San Pedro de Mera, Santa María de Bóveda, San Xóan do Campo, Poutomillos, Santa Comba e Coeses, ás que se sumarán o 27 e 28 de abril, as de Meilán, Rubiás, Santiago de Saa e Calde. En cada unha delas haberá un curso de catro horas repartido en dous días. Neste caso, a finalidade é difundir entre os maiores as actividades que desenvolve o InLugo na súa sede de Frei Plácido Rei Lemos.
Os veciños de San Pedro de Mera, en horario de 11:00 a 13:00 horas e os de Poutomillos, de 16:30 a 18:30, participan no taller Mantemos en forma o cerebro; os de Santa María de Bóveda e Santa Comba no de Manéxate coas novas tecnoloxías: coñece a túa tablet; e os de San Xoán do Campo e Coeses no de Toma e retoca a túas fotos coa tablet.
Este sábado comezarán en Friol as actividades que se desenvolverán en 11 concellos, e que se ampliarán a todos os municipios da provincia en vindeiras edicións. Haberá dous cursos en cada concello co obxectivo de facilitar o uso das novas tecnoloxías aos maiores sen ter que desprazarse do seu lugar de residencia.
Os dous cursos de Friol serán os días 11, 18 e 24 de abril. Na parroquia de Condes impartirase Manexo básico de ordenador e na de Carballo, Atréveste con internet?. A semana que vén, do 13 ao 16 de abril, o InLugo achegarase ao Concello de Castro de Rei con: Estimulación cognitiva e funcional con videoconsolas e Atréveste con internet?
Os cursos continuarán en vindeiras datas en Meira, Pol, Guitiriz, Castroverde, O Corgo, Vilalba, Xermade, Guntín e Muras.
Na sede do InLugo as actividades comezarán a semana que vén. En total 273 prazas repartidas en 21 obradoiros e cursos, dos que 14 xa teñen todas as prazas cubertas. Para os outros sete, os interesados aínda poden apuntarse a través de www.fundaciontic.org e www.deputacionlugo.gal ou chamando ao número de teléfono 982 225 186.
Os cursos abordarán o manexo de diversos dispositivos como o ordenador, a tablet ou o smartphone, así como conceptos básicos para manexarse por internet ou en diferentes redes sociais. Polo que se refire aos talleres, traballarán diferentes capacidades cognitivas e funcionais como a memoria, a atención, a orientación espacial ou o equilibrio co ordenador, a tablet ou as vídeoconsolas.
Todas estas actividades están incluídas na actuación Promoción da Autonomía Persoal dos Maiores da Provincia que xestiona a Fundación TIC a traveso dunha encomenda da Deputación con fondos exclusivamente provinciais.
