A xerencia do Sergas na área sanitaria de Lugo, Cervo e Monforte ven de emitir un comunicado no que di: ”garante asistencia pediátrica para os nenos e nenas do concello de Becerreá e municipios limítrofes. Para o Sergas, garantir a calidade da prestación sanitaria pediátrica nos nosos servizos de Atención Primaria contémplase como prioritaria”.
“É primordial poñer de manifesto que non existen especialistas en pediatría dispoñibles para ser contratados. É pois, un problema común en toda España, xa que non hai profesionais en paro nesta especialidade, o que dificulta a cobertura do cadro de persoal desta categoría nas súas ausencias regulamentarias”. Subliña
No caso concreto de Becerreá, este centro de saúde conta cunha “pediatra dous días á semana para atender á poboación infantil en idade pediátrica, compartida co Corgo (onde está outros 2 días) e con Baralla (onde atende un 1 día)”. Esta semana, esta profesional atópase de vacacións. “Durante a súa ausencia, os rapaces están perfectamente atendidos polos médicos de familia, que tamén son especialistas e están totalmente capacitados para atender aos menores de 14 anos”.
O comunicado remata: “a Xerencia da Estrutura de Xestión Integrada de Lugo, Cervo e Monforte quere manifestar que no PAC de Becerreá, e en ningún PAC, hai pediatría”.
