O PP provincial denuncia que o embarcadoiro de Los Robles podrece no Miño

O Partido Popular de Lugo, denuncia que “a Deputación de Lugo demostra unha incapacidade sen límites en moitas das áreas de xestión, e moi especialmente en todo o que ten que ver con fomento do turismo fluvial, ou, dito de outro modo, co aproveitamento dos recursos da provincia para atraer visitantes interesados na natureza e, concretamente, nos nosos ríos”.

O voceiro popular tamén aseverou, que, a área da que é responsable Pilar García Porto, “eliminou, sen prever alternativas, o servizo de catamarán do Miño, en “Los Robles”, na capital lucense. Afundido, por desidia e abandono, o barco (Pelegrín I), agora depositado nun prado de Begonte, permanece o pantalán, o embarcadoiro que, mentres podrece, constitúe un potencial risco xa que está claro que o inseguro valado que debería impedir o acceso a el non o logra”.

O portavoz provincial dos populares quere saber “que pensa facer a Deputación con este pantalán, que, con algunha reparación, parece que aínda podería ser utilizado para fines recreativos. Neste momento, en “Los Robles” -sinala Castiñeira- o único que fai e dar mala imaxe nesta área recreativa tan utilizada por lucenses e visitantes”.