Os servizos sanitarios de urxencia atenderon esta tarde aos ocupantes dunha vivenda afectados por unha fuga de gas.
Sucedeu ás 16:30 horas de hoxe nun domicilio do lugar de Vilamartín, en Vilalba, a onde se dirixiron os bombeiros da localidade para comprobar que había un mando da cociña aberto, segundo informa 112 Galicia.
Cando cortaron o subministro, airearon a vivenda e bloquearon a energía eléctrica para evitar máis problemas. Pola súa banda, o equipo médico atendeu in situ aos ocupantes da vivenda, que, finalmente, non necesitaron traslado hospitalario.
Este operativo activouse tras recibir no 112 Galicia a chamada dun veciño que solicitaba asistencia médica urxente debido a que dentro da casa había persoas dependentes. Con esta información, o persoal do Centro Integrado de Atención ás Emerxencias de Galicia pediron a colaboración dos Bombeiros de Vilalba, así como dos profesionais de Urxencias Sanitarias de Galicia-061. Tamén foi necesaria a colaboración dos axentes da Garda Civil e voluntarios de Protección Civil da localidade.
