Un cento de cebolas, tres ducias de leitugas e algúns tomates foron as primeiras especies que poboaron o horto urbano público aberto por militantes e simpatizantes do BNG – Asembleas Abertas. O candidato á alcaldía, Rubén Arroxo, dixo que “ante a pasividade decidimos ocupar simbolicamente este terreo e levar adiante os labores precisos para poñer a funcionar un horto urbano público” e engadiu que “está é unha demanda do BNG que Orozco se negou a executar, que a xente demanda e que contribúe a unha maior calidade de vida en Lugo”.
Neste acto reivindicativo, que se realizou nunha parte da parcela que no seu día ocupaba a factoría de Abella, participaron preto dunha trintena de persoas.
Arroxo sinalou que o barrio de Lamas de Prado sería un espazo idóneo para que o concello inicie este tipo de proxectos comunitarios xa que “conta con moitos espazos, moita poboación e ten a posibilidade de instalar os hortos preto das vivendas o que facilita que veciños e veciñas poidan desprazarse camiñando ata eles, cousa que non ocorre, por exemplo, nos do paseo do Rato”.
Dende o BNG – Asembleas Abertas fan unha aposta pola implantación de hortos urbanos, onde se situarían zonas de compostaxe, isto permitiría reducir considerablemente o número de toneladas de lixo que o concello de Lugo envía a SOGAMA, sobre o que Arroxo lembrou que “estamos a pagar arredor de 80 euros polo procesamento de cada tonelada”, e ademais fornecería de material para abonar os hortos ás persoas que os xestionasen.
