Dúas persoas resultaron feridas, unha delas de gravidade, como consecuencia dunha colisión entre dous turismos en Guitiriz.
Para atender ás vítimas, os servizos sanitarios de urxencia trasladaron ao lugar do accidente, en Labrada, o helicóptero medicalizado con base en Santiago.
Na aeronave foi evacuado ao hospital de Lugo un dos feridos, o que presentaba lesións máis graves, mentres que o outro implicado no accidente foi quen de saír polos seus propios medios do vehículo, e recibiu asistencia médica no mesmo lugar do sinistro.
Segundo a información recollida no 112 Galicia, a causa do golpe, o ferido máis grave quedou atrapado no interior do coche, polo que tiveron que intervir os Bombeiros de Vilalba. Así, ademais dos equipos de rescate os profesionais de Urxencias Sanitarias de Galicia-061, neste operativo participaron os axentes da Garda Civil de Tráfico e os voluntarios de Protección Civil da localidade.
Cómpre sinalar que o operativo foi activado pouco antes do mediodía de hoxe, tras recibir no 112 Galicia a chamada dunha persoa particular que advertiu sobre a gravidade dun dos implicados, pois estaba inconsciente e atrapado.
