O portavoz do goberno e concelleiro de Medio Rural, Miguel Fernández, e o edil de Desenvolvemento Local e Emprego, Mauricio Repetto participaban hoxe, en nome da alcaldesa, Lara Méndez, no acto organizado pola Asociación de Empresarios da Primeira Transformación da Madeira en Lugo, con motivo do Día Mundial do Bosques.
O responsable da área de Medio Rural quixo enxalzar a importancia dos bosques nos seus diferentes aspectos, ecolóxico, económico, ambiental, paisaxístico, cultural e de loita contra o cambio climático e pola sostibilidade en tanto “ é imprescindible incidir na concienciación da cidadanía ao respecto”.
“Un dos piares da segunda gran transformación da cidade que está levando a cabo Lara Méndez é o Urbanismo Sostible. Dentro do cal, o Concello, da man da Universidade e do Campus Terra, está apostando de forma decidida polo I+D+I co obxectivo, non só de que a transformación da madeira adquira un valor engadido, senón de que os seus usos tamén o teñan e se convertan en elementos estruturais das novas edificacións pola mellora ambiental que propician, ao tempo que se fomenta o sector forestal na provincia e se favorece o asentamento de poboación no rural”, explicou Miguel Fernández.
O concelleiro de Medio Rural finalizou a súa intervención desexándolle unha exitosa
traxectoria á Asociación organizadora do acto.
