O Tenente de Alcalde, Rubén Arroxo, xunto con Maite Ferreiro e a edil responsábel do departamento de saúde pública municipal, Cristina López, recibiron esta mañá no Concello a un grupo de enfermeiras do SERGAS, que protagonizaron a homenaxe realizada polo Goberno Municipal ao persoal sanitario. Cristina López afirmou que “a COVID-19 demostrou a calidade do noso servizo público de saúde, e a importancia de contar con medios materiais e recursos humanos para garantir a atención que merece a veciñanza”.
Cristina López agradeceu o traballo do persoal sanitario, “que tivo que saír adiante nunha situación moi complicada, con poucos coñecementos nos primeiros días de pandemia”, e destacou “o esforzo das profesionais da atención primaria, a porta de entrada ao sistema público de saúde”, para o que reclamou “profesionais e equipamento para garantir o acceso á saúde pública”.
O Día Internacional da Enfermería celébrase anualmente no 12 de maio, data de nacemento de Florence Nightingale, considerada creadora da enfermería moderna. No ano 2021, o Consello Internacional da Enfermería adica esta celebración a mostrar como a enfermería mirará cara o futuro, e como a profesión transformará a vindeira etapa da atención médica, baixo o lema Enfermería: Unha voz para liderar – unha visión de futuro para a atención da saúde.
