Axentes medioambientais da Xunta comisaron onte un total de 18 cans, adultos e cachorros, en mal estado no lugar de Outeiro, no municipio de Chantada, despois dunha denuncia do Seprona. Unha vez os veterinarios valoraron o estado da saúde dos animais, algúns foron trasladados a un refuxio e outros a un hospital veterinario para o seu posterior tratamento.
A actuación dos axentes medioambientais produciuse coa máxima celeridade unha vez recibida a denuncia do Seprona e tras a montaxe dun operativo para dispor de veterinarios, mobilizar aos axentes, preparar os vehículos de transporte, dispor de prazas no refuxio e solicitar a colaboración do Concello de Chantada.
Tres veterinarios, un deles da Consellería de Medio Ambiente, Territorio e Vivenda, ocupáronse de recoñecer aos animais, todos en mal estado de saúde e algúns con cadros de sarna. Os cans enfermos quedaron hospitalizados e actualmente están en tratamento, mentres que no refuxio permanecerán en corentena o resto dos animais comisados.
