O Concello de Lugo clausura mañá as actividades das ‘Aulas Abertas’ organizadas dende a área de Benestar co fin de facilitar a conciliación familiar e laboral, nas que participaron preto de 500 nenos e nenas de Lugo.
A concelleira destacou o éxito e a boa acollida que recibiu a convocatoria que, “nesta edición marcada pola pandemia, contou cunha participación total media que roldou o 90% do aforo permitido, permitindo a pais e nais tanto da zona rural coma da urbana organizar mellor as súas xornadas laborais e persoais coa confianza, ademais, de que os seus cativos gozaban de momentos de lecer, aprendizaxe e socialización de forma 100% segura xa que se respectaron permanente todos os protocolos sanitarios derivados da Covid”.
A resposta dos e das lucenses a estes recursos son un síntoma máis das necesidades de conciliación persoal e laboral crecentes nas familias en Lugo, explicaba a edil, que incidiu en que “dende o Goberno de Lara Méndez seguiremos a traballar nesta liña para ofrecer lecer seguro e saudable que favoreza o benestar dos máis pequenos nestos tempos complexos”.
A concelleira explicou que se traballou na realización dun completo programa de actividades que, “ademais de ser unha ferramenta para as nais e os pais traballadores, foi unha vía de escape para os pequenos de Lugo, que puideron gozar de actividades variadas de carácter educativo e lecer durante as vacacións”. Neste sentido, Olga López destacou o alto nivel de satisfacción das familias co programa así como o agrado dos máis pequenos coas actividades que levaron a cabo nestes meses.
Entre as actividades incluídas nos talleres destacaron os xogos cooperativos e de psicomotricidade, manualidades, etc, actividades que se desenvolveron sempre que se puido no exterior e que cumpriron as condicións de sanidade e hixiene óptimas de tal xeito que se ofreceu unha alternativa lúdica e tamén didáctica para que as e os cativos socializasen e compartisen vivencias, nun contexto seguro para eles e para as súas famílias.
