O candidato do Partido Popular á alcaldía de Lugo, Jaime Castiñeira, reunirase esta tarde na sede do partido con representantes das candidaturas de Ciudadanos e LugoNovo, tras a xuntanza de onte co candidato socialista López Orozco.
Deste xeito, continuará os contactos coa terceira e a quinta forza máis votadas, en reunións que se celebrarán ás 17.00 e ás 19.15 horas. A comezos da vindeira semana completará esta primeira tanda de contactos coas dúas forzas políticas restantes, BNG e Alternativa Cidadá de Esquerdas.
O popular, que acudirá ás xuntanzas de hoxe acompañado polos números dous e catro da súa lista, Ana López Pombo e Antonio Ameijide respectivamente, reiterou que “traballamos cunha única premisa: diálogo permanente para buscar os puntos en común para constituír goberno e falar só de Lugo, que é para o que nos elixiron, a uns e outros, os veciños este 24 de maio”.
