O presidente do Tribunal Superior de Xustiza de Galicia (TSXG), José María Gómez y Díaz-Castroverde, anunciou hoxe en Lugo, onde se desprazou para coñecer as demandas dos xuíces e xuízas da Audiencia Provincial e dos órganos unipersoais, que os xulgados do penal da localidade contarán cunha xuíza de reforzo. Díaz-Castroverde informou de que a Comisión Permanente do Consello Xeral do Poder Xudicial (CXPX), a proposta da Sala de Goberno do Tribunal Superior de Xustiza (TSXG), autorizou onte a concesión dunha comisión de servizo a favor da titular do Xulgado de Primeira Instancia e Instrución número 1 de Becerreá, quen, de acordo co plan de actuación proposto, deberá celebrar un mínimo de 25 xuízos ao mes en cada un dos dous xulgados e ditar 150 sentenzas ao trimestre.
Ata o ano 2020, o ingreso de asuntos nos dous xulgados do penal practicamente cumpría co establecido no módulo polo CXPX. Con todo, a entrada de novos procedementos aumentou durante os nove primeiros meses de 2021 e situouse, en ambas as unidades, ao redor do 150 %, en relación co indicador de carga de traballo. Aínda que é certo que o tempo de resposta é inferior en penal 2 que en penal 1, o presidente do TSXG sinalou que o reforzo axudará por igual a ambos os xulgados para facer fronte ao aumento da carga de traballo.
Durante os encontros que mantivo cos membros da carreira xudicial, Díaz-Castroverde analizou a situación dos órganos do partido xudicial de Lugo, os cales resolveron o ano pasado 26.500 casos, un 17 % máis que en 2020. Ademais, o número de asuntos en trámite -12.800-, descendeu un 9 %, a pesar de que o ingreso de procedementos aumentou en todas as xurisdicións. En total, en 2021 recibiron 25.000 novos casos, un 10,5 % máis que o ano anterior.
O presidente destacou o esforzo realizado polos membros da carreira xudicial e polo resto do persoal da Administración de Xustiza para reducir a pendencia. Ademais, hai que lembrar que o Xulgado de Instrución número 1 de Lugo está reforzado, do mesmo xeito que os xulgados de primeira instancia e a sección civil da Audiencia Provincial. As unidades do social tamén estiveron reforzadas ata hai pouco.
