O Grupo Socialista da Pobra do Brollón fíxose eco das denuncias e das queixas da veciñanza polo mal estado no que se atopa os accesos ás adegas milenarias de Vilachá. Concretamente na Abelaira, na parroquia de Vilachá de Salvador, é onde se atopan estas construcións tradicionais.
Este entorno, denuncian os socialistas, “está completamente abandonado, os camiños cheos de bulleiro e sen poder transitar por eles, nin andando nin en coche, dando unha imaxe penosa e de abandono moi lamentable do noso concello”.
O candidato socialista á Alcaldía, Adolfo Rubio Pascual, sinala que “non entende o estado de abandono por parte do Concello no mantemento e roza destas zonas turísticas tan concorridas, nas que ademais se promoven visitas guiadas”.
Nesta liña, denuncia que, “por unha banda, o Concello impulsa o turismo, pero non acompaña esta medida con outras accións de mantemento e conservación do seu entorno natural, algo fundamental para poder promovelo. Cremos que para potenciar o turismo hai que coidar primeiro o gran patrimonio do noso municipio”.
Por iso, o socialista avanza que traballará xunto coa candidatura por promover “un turismo sostible, capaz de dinamizar a nosa economía e poñer en valor o noso rico patrimonio cultural, coa axuda de todos e todas. E executaremos un plan de mantemento e conservación das rutas turísticas da nosa vila, xunto co amaño das pistas a través das diferentes axudas para investimentos”.
