Ao grito de “Eulen, escoita a limpeza está de loita”, as traballadoras do sector da limpeza de Lugo ocupan as oficinas da empresa Eulen na cidade para reclamar un convenio digno e denunciar o bloqueo das negociacións por parte da patronal.
O sector limpeza de Lugo leva en folga dende o pasado 16 de outubro para protestar contra un convenio que aseguran “é dos máis baixos de toda Galiza”, levando a cabo diversas iniciativas para demandar melloras e dar a coñecer a súa situación. Onte as traballadoras fixeron un percorrido dende a Praza de Santo Domingo, onde se atopa a sede da patronal, ata o edificio da Deputación na rúa San Marcos. Tamén lanzaron fregonas ao chan ante o edificio do Concello o pasado luns; e o martes levaron a cabo unha caravana de vehículos por toda a capital lucense.
