A Deputación aprobou hoxe o investimento de arredor de 360.00 euros para a creación, mellora e mantemento de varios servizos públicos dos concellos de Viveiro, Castroverde e Guitiriz.
Desta partida, 200.000 euros destinaranse para a dinamización do turismo de Viveiro, con accións como o reforzo da información e a potenciación das rutas turísticas, a contratación de concertos para as festas patronais, ou o alugueiro de escenarios para eventos culturais. Tamén se empregará este diñeiro para manter algúns servizos públicos coma o cemiterio, o alumeado público, a plaza de abastos ou o servizo de poda, entre outros.
A Castroverde destinaranse 150.000 euros para a mellora da mobilidade no concello. Para iso acondicionaranse as vías que pasan polos núcleos de Miranda, Vilacote, Lourentín, Furís de Abaixo, Riomol e A Meda. Tamén se pavimentará con formigón o núcleo de Miranda e se mellorará a recollida de augas pluviais de Folgueiras.
En canto ao concello de Guitiriz, o groso das obras terán lugar na rúa Boa Veciña, na parroquia de Lagostelle. Destinaranse algo máis de 7.000 euros en comprar materiais para as obras de humanización desta rúa, e 114.000 euros para a rehabilitación e pavimentación dun firme máis groso e a redución da altura existente entre a calzada e as beirarrúas. Tamén se instalarán novos bancos e papeleiras.
