José Tomé acusou á Conselleira de Infraestruturas, Ethel Vázquez, de “mentir” sobre a Vía de Alta Capacidade Costa Norte. Así referiuse a unhas declaracións de Vázquez nas que culpaba á Deputación de Lugo e ao Concello de Viveiro da parálise de preto de 15 anos desta estrada entre Ferrol e San Cibriao. Tomé tamén culpou á conselleira dunha atitude “escapista e botaculpas” e á Xunta de Galicia da parálise.
“As declaracións da Conselleira supoñen unha falta de respecto ás institucións e aos veciños e veciñas da Mariña, que, en todo caso, xa non pasan por este trágala, porque saben ben quen ten a responsabilidade de facer esta obra, que é a Xunta de Galicia”, asegurou o mandatario provincial.
O presidente incidiu en que os dous únicos tramos feitos da VAC Costa Norte -as variantes de Xove e de Ortigueira- son obra do Goberno da Xunta presidido por Emilio Pérez Touriño, que os deixou licitados. “Dende entón, o Executivo, primeiro de Feijóo e logo de Rueda, téñena parada, pois consignan partidas no Orzamentos ano tras ano,
pero logo nunca as executan”, afirmou Tomé nun comunicado.
O mandatario provincial tamén excusa á Deputación asegurando que “non ten nada que ver nesta obra”, e ao Concello de Viveiro, “que tivo que adaptar o PXOM á modificación imposta pola Xunta, coa que romperon co consenso veciñal e institucional ao que se chegara co proxecto orixinal”.
