Os colectivos de enfermeiras convocan para este xoves varias concentracións ante hospitais galegos para reclamar “os dereitos que fomos perdendo nas últimas dúas décadas”.
Na provincia de Lugo están convocadas tres concentracións: unha na entrada principal do hospital de Monforte de Lemos ás 13.00 horas, outra na entrada principal do Hula ás 13.00 horas e outra na porta xiratoria do hospital da Mariña ás 11.30 horas.
“O uso abusivo de contratos precarios, de días, ou no mellor dos casos, de meses, xera unha gran presión nos profesionais e supón un risco innecesario para a seguridade dos doentes, minguando a calidade asistencial”, aseguran dende A Por Todas (APT), asociación que convoca as protestas. Tamén protestarán pola “evidente falta de enfermeiras dispoñibles para cubrir as ausencias do persoal da plantilla estable” e pola “mala xestión da administración e a falta de previsión das crecentes necesidades dunha poboación cada vez máis lonxeva”.
Dende o colectivo tamén animan ao resto de categorías que se vexan afectadas polas súas demandas “a que acudan ás concentracións e se unan ás nosas peticións, xa que son melloras comúns”.
