Este sábado 18 de novembro ás 20.00 horas, a Casa-Museo Manuel María acolle o concerto ‘Na Casa Deles’, unha homenaxe que o cuarteto vocal Son de Corda fai a distintos distintos escritores lucenses xa falecidos. Concretamente a Manuel María, Uxío Novoneyra, Darío Xohán Cabana Lorenzo Varela, Luís Pimentel e Álvaro Cunqueiro.
Esperanza Iglesias, soprano, Carmen Prendes, contralto, Fernando G. Jácome, tenor, e Antón Castro, baixo, son as voces de Son de Corda, que co acompañamento do pianista Raúl Rodríguez e a violinista Aldara Palmeiro, interpretarán un repertorio de composicións baseadas en poemas dos escritores homenaxeados, alén doutras pezas musicais.
Durante o decorrer do concerto, proxectaranse sete curtas feitas por Manuel Lucas Mariño en distintos lugares vinculados á biografía e á escrita dos propios poetas, e onde persoas coñecedoras das súas obras (Mercedes Queixas, Branca Novoneyra, Alexandra Cabana, Carlos Callón, Beatriz Dourado, Antonio Reigosa e Xoán R. Cuba) salientan a relación dos espazos ou lugares, recollidos nas imaxes, cos escritores que protagonizan o proxecto. Nestes mesmos espazos, o compositor e produtor musical, Arturo Vaquero, gravou as distintas cancións interpretadas por Son de Corda.
A entrada para presenciar o concerto é libre, mais é necesario facer reserva previamente en contacto@casamuseomanuelmaria.gal ou no whatsapp 698177621.
