O Concello de Lugo reclamará á Xunta que efectúe os investimentos necesarios no colexio da Ponte. Segundo a Tenencia de Alcaldía, nunha xuntaza da Comisión de Infraestruturas celebrada esta mañá, o PP reclamou unha serie de actuacións no centro, “que requiren de investimentos, e polo tanto corresponden á Xunta”, explicou o concelleiro de Infraestruturas, Alexandre Penas.
O concelleiro engadiu que “no caso dos colexios públicos, o Concello de Lugo é responsable das pequenas actuacións de mantemento, mais os investimentos e as melloras das instalacións corresponden á Xunta”.
Dende o Concello anuncian que trasladarán as actuacións necesarias neste centro para garantir as mellores condicións para o estudantado e o profesorado. Alexandre Penas declarou que “agardamos que o PP de Lugo reclame tamén ao goberno galego que execute estas actuacións no menor prazo de tempo posible”.
