Hoxe 6 de abril, sábado, ás 20 horas, Antía Muíño, unha das novas voces da música galega, ofrecerá un concerto na Casa-Museo Manuel María en Outeiro de Rei. O seu rexistro móvese entre o jazz-pop, a canción alternativa de autora e a música tradicional.
Neste ano publicou o novo sinxelo “O Paxaro” e xa está a traballar en novos temas, que acompañarán nos directos ao seu aplaudido “Carta Aberta”, o seu álbum debut que ten case 2 millóns de reproducións.
Antía Muíño, que estará soa no escenario, acompañará a súa voz coa súa guitarra clásica e coa pandeireta, intercalando a intimidade e o virtuosismo das súas autorías coa potencia da percusión e o canto tradicional.
