A alcaldesa de Lugo, Paula Alvarellos, presidiu esta mañá a toma de posesión de Beatriz Pérez Traseira como nova xefa do Servizo de Educación do Concello de Lugo. Esta incorporación faise en comisión de servizo, mentres a titular da praza exerce as súas funcións noutra administración.
A rexedora trasladoulle os seus parabéns a Beatriz Pérez, destacando que a súa incorporación reforzará o equipo técnico de Educación, “clave para construír o futuro da nosa cidade”. Alvarellos subliñou a importancia de seguir apostando por políticas educativas inclusivas e innovadoras, co fin de mellorar a calidade de vida da cidadanía.
Deste xeito, a chegada de Beatriz Pérez Traseira complementa as recentes incorporacións levadas a cabo noutras áreas do equipo municipal e fortalece o compromiso do Concello con aqueles ámbitos clave que, como a educación, son motor de progreso e igualdade.
