A Semana de Cine rendeulle unha homenaxe na tarde de onte á actriz lucense Melania Cruz, coa descuberta dunha placa no Paseo do Cine de Lugo, no parque de Frigsa, e cun acto no Salón de Actos do Pazo de San Marcos onde se proxectou o filme “Pontevedra hora cero” de Alfonso Zarauza, un dos que figura na longa lista de películas, series de televisión e obras de teatro en que a actriz lucense participou ao longo da súa traxectoria.
A actriz Melania Cruz é unha das actrices máis recoñecidas de Galicia e conta cunha extensa carreira no teatro, cinema e na televisión. Ten acadado os premios máis importantes da escena galega. En 2021 foi recoñecido o seu traballo co galardón Mestre Mateo a Mellor Interpretación Feminina por «ONS», de Alfonso Zarauza. Destacan os seus traballos en cinema como protagonista de «Arima», «Dhogs» e «A Esmorga»; e para televisión en series como «Clans», «Rapa T.2» e «A Unidade». En 2022, Melania gañou o premio de Cultura Galega das artes escénicas.
