Lugo incorpora desde mañá a dez novos axentes ao seu corpo da Policía Local. Deles, sete de prazas libres tomaron hoxe posesión, mentres que os outros tres de mobilidade xa o fixeron a pasada semana. Asemade en breve incorporaranse outros sete axentes, que actualmente están en formación na Academia, e se cubrirán seis postos no organigrama de mandos.
Actualmente o cadro de persoal da Policía Local está integrado por 125 axentes, aos que nos próximos meses se sumarán outros sete axentes e un mando por mobilidade. Deste xeito o Goberno Local sigue adiante para cumprir co obxectivo de irse aproximando ata os 140 operativos da Policía Local, tal e como establece a Relación de Postos de Traballo.
