Os veciños e veciñas que conforman a Plataforma Pro Residencia de Becerreá acudiron hoxe ao Parlamento de Galicia para esixirlle ao presidente da Deputación de Lugo a apertura do centro comarcal de atención a maiores que leva preto de 3 anos rematado e aínda pechado sen ofrecer servizo aos veciños e veciñas da comarca e sen xerar postos de traballo.
A Plataforma estivo apoiada polo PP de Becerreá cuxo portavoz, José Fernández Carrete, así como concelleiros do Grupo Municipal Popular que tamén se desprazaron a Santiago de Compostela para reivindicar a apertura de dita residencia, coincidindo coa comparecencia do presidente do goberno provincial, José Tomé, no Parlamento de Galicia sobre os orzamentos da Deputación de Lugo para o vindeiro ano 2025.
O portavoz popular lembra que “está a rematar o 2024 e continuamos coa residencia pechada”. Por iso, Carrete esixe ao goberno provincial de PSOE e BNG “partidas orzamentarias concretas” para garantir o equipamento que falta -como a cociña, por exemplo- e tamén “realizar todos os trámites que sexan necesarios para que a súa apertura sexa unha realidade”.
