O Partido Popular denuncia a grave situación que están a vivir os veciños de Lugo á hora de xestionar o servizo de reparación de fugas de auga. Nos tres últimos días rexistráronse múltiples incidencias, xa que coincidindo coa fin de semana e o luns festivo, tiveron lugar seis fugas en distintos puntos da cidade e algunha destas avarías continúa hoxe mercores. Unha das fugas que máis preocupou aos técnicos foi a que afectou ao veciños do Sagrado Corazón e a Calzada das Gándaras que tanto o día de Reis como onte martes estiveron todo o día sen auga, e que non foi ata última hora de onte que se restableceu o suministro.
Os populares esixen “explicacións inmediatas sobre as razóns que levan a que, malia que o pasado 19 de decembro se adxudicou o contrato para a reparación de avarías nocturnas e durante festivos e fins de semana, os atrasos continúan a ser a norma”. Esta situación evidencia, segundo o grupo municipal, “a incapacidade do goberno local para garantir un servizo básico e esencial”
Desde o PP lembran “que o desmantelamento da brigada municipal de augas marcou o inicio dunha xestión errática, agravada pola implantación dunha solución temporal que non foi capaz de cumprir cos obxectivos”. “Estamos ante un exemplo claro de mala organización e
falta de previsión, e os veciños non poden seguir pagando as consecuencias deste desleixo”, sinalan.
E insisten que “urxe que o goberno actúe con contundencia para evitar máis demoras na reparación de avarías na rede de abastecemento. A cidade non pode permitirse seguir padecendo un servizo deficiente que prexudica gravemente o día a día da veciñanza”.
