Ás 22:20 horas, un particular explicou ao 112 Galicia que ardían as instalacións dunha granxa de pavos situada en Campelo (O Corgo). Pouco despois, eran os propietarios da nave os que contactaron e confirmaron que non había persoas feridas, nin tampouco había animais no interior, xa que foran trasladados esa mesma tarde.
De inmediato, desde o Centro Integrado de Atención ás Emerxencias pediuse a intervención dos Bombeiros de Sarria e da Garda Civil, que contaron coa colaboración dos efectivos do distrito forestal da zona e dos Bombeiros de Lugo durante as tarefas de extinción.
Os servizos de emerxencias traballaron durante varias horas para apagar as lapas, o que conseguiron pasadas as 1:15 horas, mentres que a carón da nave na que se orixinou o lume había outra que non resultou afectada.
O incendio calcinou as instalacións, duns 50 metros de longo, case por completo.
