A edil popular, Ana López Pombo, entende “a desconfianza dos comerciantes” que están indignados pola mala planificación da intervención xa que, a estas alturas, descoñecen a onde e cando se irán dos seus postos. A concelleira cualificou de “tomadura de pelo e falta de respecto” a última xuntanza que mantivo o equipo de goberno cos praceiros. “Estar, a estas alturas, con tomas de contacto sen unha programación definida do traslado dos postos reflicte unha falta de ideas e de reflexos absoluta para solucionar cuestións do día a día”.
A concelleira popular reclamou ao goberno local fixar, na próxima semana, a data de comezo das obras da praza, o lugar onde resituar aos praceiros e como se indemnizará aos afectados en caso de que os traballos da intervención prevista neste edificio superen os 33 días.
Ana López indicou que “se o concello ten asegurada unha indemnización do construtor se se retrasa na execución da obra debería tamén garantir aos afectados unha compensación no caso de que superen os prazos anunciados”.
