A sección segunda da Audiencia Provincial de Lugo condenou a sete anos de cárcere a un acusado de agredir sexualmente a un menor co que contactou a través da aplicación Grindr. O tribunal considera probado que, en febreiro de 2022, o procesado, que tiña 41 anos, concertou unha cita “para manter un encontro de carácter sexual” coa vítima, de 14 anos, tras intercambiar “mensaxes de índole sexual”. Os maxistrados aseguran que mantivo relacións sexuais co menor no interior dun vehículo, a pesar de ser “consciente da súa escasa idade”.
A Sala descarta a existencia de motivos espurios ou de inimizade previa. Así, salienta que o menor “só contou os feitos tras ser visitado polos axentes do Corpo Nacional de Policía que investigaron os mesmos ao poñelo no seu coñecemento o pai dunha das amigas deste, recoñecendo varias veces en sede xudicial que non quería denunciar, que non sabía por que estaba alí, que quedara voluntariamente co acusado, chegando a manifestar que non se sentía violado porque non dixera que non”. En canto a verosimilitude da versión ofrecida pola vítima, o tribunal entende que se trata “dun relato coherente e que se ve avalado por outras circunstancias”, entre elas as mensaxes que ambos se intercambiaron.
