A sección segunda da Audiencia Provincial de Lugo absolveu ao acusado do dobre crime do Cash Record, sucedido o 30 de abril de 1994 no polígono do Ceao, no que faleceron, tras ser tiroteados, unha caixeira e un repoñedor do establecemento, pois salienta que “ningunha proba, nin sequera indicio, coloca ao procesado no polígono do Ceao a noite que sucederon os feitos”. O tribunal incide na sentenza en que “non existe proba suficiente que o sitúe o día dos feitos no lugar do crime”, á vez que recalca que “non se xulga á persoa do procesado, nin o tipo de vida que levaba, nin sequera se era un home que vivía de costas á lei, senón se ese día entrou en Cash Record, matou as dúas vítimas e se apoderou da cuantiosa recadación -próxima a 3.777.026 pesetas-”.
Os maxistrados indican que, tal e como sinala o Tribunal Supremo, as sospeitas sobre a posible autoría do acusado “non chegan á condición de indicios” porque moitas delas “teñen outra explicación diferente á que pretende darse”. Ademais, afirman que “nin sequera no seu conxunto” poden apuntar, “sen xénero de dúbida, tal e como esixe unha resolución penal”, ao procesado como autor dos feitos polos que se lle xulga. Por iso, decretan a súa absolución. A resolución non é firme, pois contra ela cabe presentar recurso de casación ante o Tribunal Supremo.
