Achegámonos á Semana Santa e a provincia de Lugo amosa os seus mellores datos relativos á Covid. Se no día de onte informabamos dun repunte chamativo, o certo é que no día de hoxe non só se recuperou o ritmo de descenso en diferentes baremos senón que aumentou en gran medida a baixada.
Así mentres que as altas continúan subindo a bo ritmo, con 13 persoas curadas nas últimas horas chegando xa ás 11591 en toda a provincia dende que comezou a crise sanitaria; as persoas que contan nestes intres cunha infección activa baixan en 8 casos, ata as 177.
Bos datos que non se acadaban na provincia dende mediados do mes de agosto. Asemade, hai que ter en conta o descenso tamén dos positivos detectados que onte foron 4, por baixo dos 8 detectados na xornada anterior.
Por último, como boa nova non podemos deixar de falar do descenso da presión asistencial. Mentres en plantas de hospitalización se rexistran 8 pacientes covid, 3 menos que na xornada de onte, repartidos polos tres hospitais públicos da provincia, 5 no HULA, 1 na Mariña e 2 en Monforte; a UCI do HULA aumenta nun caso chegando ás 3 persoas ingresadas en coidados intensivos.
