A Deputada de Réxime Interior, Promoción do Territorio e Turismo participou este xoves no acto de inauguración da XIII edición do Seminario de Verán sobre a Paisaxe: Paisaxe e Diversidade, que organizan a Universidade de Santiago e o Concello de Guitiriz na Casa da Habanera da localidade chairega no marco da Universidade de Verán. Na apertura das xornadas, que se desenvolven entre hoxe e o venres, tamén participou a Alcaldesa de Guitiriz, Marisol Morandeira, a vicerreitora de Coordinación da Universidade de Compostela no Campus de Lugo, Montserrat Valcárcel Armesto, a directora de Promoción da Axencia Turismo de Galicia, Carmen Pita, o director do seminario, Roxelio Pérez, e a secretaria do seminario, María Julia Melgar.
A deputada puxo de manifesto a importancia destes seminarios de verán. “Achegar a Universidade aos concellos forma parte da nosa aposta por garantir un acceso universal á educación superior, tanto no que respecta aos cursos regrados, como neste tipo de seminarios ou cursos de verán”. Así mesmo, “con este formato pódese levar a distintos puntos do territorio unha serie de coñecementos rigorosos, actualizados, que permiten complementar ou renovar a formación das persoas. Porque, se ás veces pode ser un problema atopar tempo para volver ás aulas, hai que facer que sexa a Facultade a que se acerque aos alumnos e alumnas na súa vila”, engadiu a Deputada.
Durante a súa intervención, a voceira provincial recalcou ademais que “este tipo de formación axuda a coñecer máis o medio que nos rodea, e neste caso, afonda naqueles aspectos relacionados coas estruturas xeolóxicas que compoñen a nosa paisaxe. Vivimos nun entorno singular e variado que ten un gran interese dende o ámbito da paisaxe. Unha paisaxe que é beleza, que é unha herdanza que cumpre conservar, pero que tamén é o punto de partida para desenvolver políticas de desenvolvemento económico relacionadas co sector primario, co turismo, a hostalería ou a gastronomía”.
O seminario arrancou este mércores coa conferencia inaugural O Antropoceno. Un planeta en risco? que impartiu o catedrático emérito Francisco Díaz-Fierros Viqueira, e continuará ao longo deste xoves e venres con diferentes sesións con expertos e estudosos sobre a xeodiversidade de territorio e as diferentes accións naturais que configuran a paisaxe galega.
