A Consellería de Medio Ambiente e Ordenación do Territorio destinará 765.500 euros a financiar 25 proxectos de particulares na provincia de Lugo para realizar actuacións de recuperación, preservación e mellora en espazos incluídos na Rede Natura 2000.
O delegado territorial da Xunta en Lugo, José Manuel Balseiro, anunciou que este investimento permitirá realizar actuacións de rehabilitación de elementos tradicionais e diversas iniciativas de adecuación e mellora en once concellos lucenses. En concreto, serán sufragados proxectos en Navia de Suarna (cinco), Cervantes (cinco), Folgoso do Courel (tres), Quiroga (tres), A Pobra do Brollón (dous), Samos (dous), Xove, Muras, Begonte e Sober (un en cada municipio) e unha actuación de mellora do estado de conservación de zonas da Rede Natura que abrangue conxuntamente espazos de Outeiro de Rei, Begonte e Cervantes.
Este investimento permitirá financiar proxectos como a mellora de carreiros rurais, a creación dunha área recreativa, a rehabilitación de muros de pedra tradicionais, peches de madeira e lousados, a recuperación de soutos, a restauración de tres hórreos, a creación de roteiros de sendeirismo e diversas iniciativas de preservación, mellora e posta en valor da biodiversidade.
Segundo precisou Balseiro, os beneficiarios das axudas son tanto particulares como comunidades de montes ou asociacións. O Goberno galego achega a totalidade do orzamento das actuacións, de forma que os promotores só deben asumir o IVE.
