A Xunta volveu a aprobar onte o trámite imprescindible para crear no pavillón do Antigo Xeral, no que fora a Escola de Enfermaría, unha oficina de emprego. Segundo informaba onte o executivo autonómico, o Consello autorizou a retrocesión deste pavillón despois de que o trámite fose acordado a pasada semana entre representantes da Consellería de Facenda e da Tesourería Xeral da Seguridade Social, que é a administración propietaria deste inmoble. A Xunta lembrou, ademáis, que todavía está a espera da licenza municipal para facer o centro integral de saúde no antigo Materno.
Neste senso, o goberno local advertiu hoxe que este trámite necesario da retrocesión, xa o dera o Consello da Xunta, o 8 de marzo do ano pasado, ademais coa mesma fórmula da retrocesión, e “anulouno en maio, sen facelo público, o día da moción de censura a Rajoy”.
Así, segundo os socialistas de Lugo, o acordo adoptado pola Xunta onte “dá a razón ao Concello” cando en outubro pasado denunciou a paralización polo Goberno de Feijóo do procedemento imprescindible para dotar de usos non sanitarios ao Xeral, e retrata ao PP, pois, ao reactivar o trámite utilizando a mesma fórmula da retrocesión dos terreos, demóstrase que retardou intencionadamente o proxecto e mentiu para tratar de xustificalo.
De feito, cando a Alcaldesa advertiu da manobra de dilación, o PP deu ata tres versións distintas dos motivos, “todas falsas”, como queda agora á luz: dende que habería que buscar a fórmula máis axeitada para a ampliación dos usos dos terreos –versión dada por Feijóo- ata que se axilizarían e simplificarían os trámites, un argumento que ofreceu o Conselleiro de Facenda no Parlamento, co cal, “mentiu na Cámara representativa de todos os galegos”.
Segundo o goberno local, coa reactivación dos trámites tamén queda demostrada a total disposición do Goberno central do PSOE de axilizar os pasos necesarios para a revitalización do barrio, “fronte a actitude obstruccionista que mantivo o Executivo do PP durante 7 anos, sempre coa complicidade do partido a nivel local e do hoxe candidato popular a Alcaldía, entón na subdelegación do Goberno”.
