A Xunta de Galicia reitera que o actual protocolo si permite a instalación de atraccións de feira nos concellos en nivel medio ou baixo, como é o caso de Lugo, sempre que se dean certas medidas de seguridade, ao igual que se fixo noutras cidades galegas.
Así o explicou o delegado territorial de Lugo, Javier Arias, quen sinalou que “O protocolo da Xunta deixa marxe para a actividade dos feirantes, como se ten demostrado este mesmo verán noutras cidades galegas, como poden ser Ferrol, Ribeira ou localidades mais pequenas como Sada, todas na provincia da Coruña, concellos que si traballaron para buscar solucións, e nos que houbo vontade política para facelo”.
Se ben, insistiu en que permitir a súa instalación “esixe da posta en marcha de medidas que garantan a seguridade e tamén a implicación do Concello, que é a autoridade que debe verificar, por exemplo, a capacidade nos espazos comúns”.
