O Concello de Lugo abriu o prazo de solicitude para a organización das cacharelas de San Xoán.
Unha tradición con moito apego na capital que se revalida e que, nesta ocasión, resulta coincidente coa celebración do Arde Lvcvs.
Os colectivos ou particulares interesados poden acceder aos formularios na sede da Policía Local e solicitalos até ese mesmo día, segundo recolle o bando ditado pola Alcaldía e publicado no Boletín Oficial da Provincia esta mesma mañá.
Un documento no que se indican as normas ás que deben axustarse as fogueiras e no que se contempla a prohibición da queima de rodas e cubertas de goma, plásticos ou calquera derivado de hidrocarburos, así como de materiais ou produtos contaminantes, fedorentos ou tóxicos. Tampouco estará permitido lanzar foguetes.
Tal e como sinala o texto, os lumes deberán afastarse de localizacións nas que existan liñas eléctricas, inmobles, zonas verdes ou xardíns e tampouco poderán realizarse no Centro Histórico nin en emprazamentos que entrañen algún tipo de perigo para a poboación.
Ademais, as persoas responsables das mesmas deberán, á súa finalización, retirar do lugar da celebración todos os restos que queden unha vez rematado o evento coa advertencia de que, en caso de incumprimento dalgún destes termos, o Servizo de Extinción de Incendios, a requirimento da Policía Local, procederá a apagala de inmediato.
