O voceiro de ACE, en resposta ao comunicado emitido polo Concello de Lugo, onde facía referencia á xestión e prazos do PXOM, declarou que “non se entende que o PSOE presuma de que o PXOM de Lugo obtivo 15 sentenzas favorables, cando o de Vigo obtivo case un cento delas e aínda así acaba de ser anulado. Cunha soa sentenza desfavorable que sexa pertinente é suficiente, e ante esa o resto perden o seu valor”.
“Precisamente, o pasado marzo o alcalde de Vigo, Abel Caballero, congratulábase de que tras 98 sentenzas favorables, o urbanismo vigués ficaba por fin en situación de seguridade xurídica”, e só oito meses despois, o Tribunal Supremo anulou de pleno dereito o PXOM de Vigo”, declarou Portomeñe.
“Ademais, o goberno local contradise, no mesmo escrito din unha cousa e a contraria: primeiro que o informe da Xunta previo á aprobación inicial non é vinculante e acto seguido que se aprobou un PXOM cun contido distinto en 2006 polo mandato obrigatorio da LOUGA e como consecuencia das modificacións introducidas a consecuencia do devandito informe. Que se aclaren, había que facer os cambios indicados pola Xunta para adaptar á Lei do Solo ou non?”, preguntou Portomeñe.
